Vinir í kyrrð og bæn

Friðarstund í Laugarneskirkju

Viltu vera hluti af alveg sérstakri guðsþjónustu, sem fer fram í kyrrð og íhugun? Laugardaginn 29. nóvember verður guðsþjónusta í safnaðarheimilinu sem fer fram samkvæmt hefð kvekara.

Kvekarar eru kristin kirkjudeild sem sker sig mjög úr í flóru kristinna safnaða, sérstaklega þegar kemur að helgihaldinu en enginn einn leiðir stundina og engin tónlist er leikin. Stundin fer þannig fram að við setjumst á stóla sem er raðað í hring, í miðjum hringnum er lítið borð með blómum og lesefni sem má blaða í á meðan stundinni stendur.

Ef einhver finnur hjá sér að deila bæn eða ritningarversi má gera það. Það er líka partur af prógraminu að standa upp og hreyfa sig, fá sér vatn að drekka og gera það sem líkaminn kallar á.

Stundin tekur u.þ.b. klukkutíma og á eftir verður tími fyrir smá hressingu og samtal. Guðsþjónustan er í umsjón sóknarprests og David Noble sem er einn af messuþjónum Laugarneskirkju, en David tilheyrir trúfélagi kvekara í heimalandi sínu, Englandi.

Húsið opnar kl. 11, stundin hefst kl. 11.30.