Leikrit um höggorm, konu og mann

höggormurinn

Persónur og leikendur:

Sögumaður
Höggormur
Konan
Maðurinn
Guð

Við erum stödd í aldingarðinum Eden. Maðurinn og konan lifa í sátt og samlyndi við sköpunina og hafa nóg að bíta og brenna. En þá dregur til tíðinda….

Sögumaður: Höggormurinn var slóttugri en öll dýr merkurinnar sem Drottinn Guð hafði gert. Hann sagði við konuna:

Höggormur: „Er það satt að Guð hafi sagt: Þið megið ekki eta af neinu tré í aldingarðinum?“

Sögumaður: Konan svaraði höggorminum:

Konan: „Við megum eta af ávöxtum trjánna í aldingarðinum en um ávöxt trésins, sem stendur í miðjum aldingarðinum, sagði Guð: Af honum megið þið ekki eta og ekki snerta hann, ella munuð þið deyja.“

Sögumaður: Þá sagði höggormurinn við konuna:

Höggormur: „Sannið til, þið munuð ekki deyja. En Guð veit að um leið og þið etið af honum ljúkast augu ykkar upp og þið verðið eins og Guð og skynjið gott og illt.“

Sögumaður: Þá sá konan að tréð var gott af að eta, fagurt á að líta og girnilegt til fróðleiks. Hún tók af ávexti þess og át og gaf einnig manni sínum, sem með henni var, og hann át. Þá lukust upp augu þeirra beggja og þeim varð ljóst að þau voru nakin. Þau saumuðu því saman fíkjuviðarblöð og gerðu sér mittisskýlur.

Þá heyrðu þau til Drottins Guðs sem gekk um í aldingarðinum í kvöldsvalanum og maðurinn og kona hans földu sig fyrir augliti Drottins milli trjánna í aldingarðinum. Drottinn Guð kallaði á manninn og sagði við hann:

Guð: „Hvar ertu?“

Sögumaður: Og hann svaraði:

„Ég heyrði til þín í aldingarðinum og varð hræddur því að ég er nakinn, og ég faldi mig.“

Sögumaður: Hann sagði:

Guð: „Hver sagði þér að þú værir nakinn? Hefur þú etið af trénu sem ég bannaði þér að eta af?“

Sögumaður: Maðurinn mælti:

Maður: „Konan sem þú hefur sett mér við hlið, hún gaf mér af trénu og ég át.“

Sögumaður. Þá sagði Drottinn Guð við konuna:

Guð: „Hvað hefurðu gert?“

Sögumaður: Konan svaraði:

Konan: „Höggormurinn tældi mig og ég át.“

Sögumaður: Þá sagði Drottinn Guð við höggorminn:

Guð: Af því að þú gerðir þetta
skaltu vera bölvaður
meðal alls fénaðarins
og meðal allra dýra merkurinnar.
Á kviði þínum skaltu skríða
og mold eta
alla þína ævidaga.
Ég set fjandskap
milli þín og konunnar
og milli þinna niðja og hennar niðja.
Þeir skulu merja höfuð þitt
og þú skalt höggva þá í hælinn.

Sögumaður: Við konuna sagði hann:

Guð: Mikla mun ég gera þjáningu þína
er þú verður barnshafandi.
Með þraut skaltu börn fæða,
samt skaltu hafa löngun til manns þíns
en hann skal drottna yfir þér.

Sögumaður: Við Adam sagði hann:

Guð: Vegna þess að þú hlýddir röddu konu þinnar
og ást af trénu sem ég bannaði þér að eta af,
þá sé akurlendið bölvað þín vegna.
Með erfiði skaltu hafa viðurværi af því
alla þína ævidaga.
Þyrna og þistla skal landið gefa af sér
og þú skalt lifa á grösum merkurinnar.
Í sveita þíns andlitis skaltu brauðs þíns neyta
þar til þú hverfur aftur til jarðarinnar
því af henni ertu tekinn.
Því að mold ert þú
og til moldar skaltu aftur hverfa.

Leikritið er orðrétt textinn í 1Mós 3.1-19 og verður flutt í guðsþjónustu 1. sunnudag í föstu í Laugarneskirkju.

Myndin er eftir Lucas Cranach eldri, en hann var snillingur og samtímamaður Lúthers í Wittenberg….